फुटबॉलसम्राट लायोनेल मेस्सी यांचे सॉल्ट लेक स्टेडियममध्ये भव्य स्वागत; अव्यवस्थेमुळे चाहत्यांचा संताप. हैदराबादमध्येही जल्लोषात स्वागत. 

फुटबॉलसम्राट लायोनेल मेस्सी यांचे सॉल्ट लेक स्टेडियममध्ये भव्य स्वागत; अव्यवस्थेमुळे चाहत्यांचा संताप. हैदराबादमध्येही जल्लोषात स्वागत.

क्रीडा वृत्त: एन वाय नवा भारत डिजिटल न्यूज नेटवर्क

जागतिक फुटबॉलमधील सर्वोच्च नाव मानले जाणारे लायोनेल मेस्सी हे तब्बल १४ वर्षांनंतर भारत दौऱ्यावर आले असून ‘GOAT इंडिया टूर 2025’ मुळे देशभरात फुटबॉलप्रेमींमध्ये प्रचंड उत्साह पाहायला मिळत आहे. शनिवारी सकाळी मेस्सी कोलकाता येथे दाखल झाला. विमानतळापासूनच रस्त्यांच्या दुतर्फा चाहत्यांनी गर्दी करत त्याचे जल्लोषात स्वागत केले. दीर्घकाळानंतर भारतात आलेल्या या दिग्गज खेळाडूला प्रत्यक्ष पाहण्यासाठी चाहते पहाटेपासूनच सॉल्ट लेक स्टेडियम परिसरात जमा झाले होते.                                                   

सॉल्ट लेक स्टेडियममध्ये मेस्सीच्या स्वागतासाठी भव्य कार्यक्रमाचे आयोजन करण्यात आले होते. या कार्यक्रमात मेस्सीच्या ७० फूट उंच पुतळ्याचे व्हर्च्युअल अनावरण करण्यात आले. हा क्षण ऐतिहासिक ठरेल, अशी अपेक्षा आयोजकांनी व्यक्त केली होती. मात्र, प्रत्यक्षात कार्यक्रमाला मोठ्या प्रमाणावर गैरव्यवस्थापनाचा फटका बसला. क्षमतेपेक्षा जास्त प्रेक्षकांना प्रवेश देण्यात आल्याने अनेक तिकीटधारक चाहत्यांना मेस्सीचे नीट दर्शनच झाले नाही. यामुळे स्टेडियममध्ये असंतोषाचे वातावरण निर्माण झाले.संतप्त झालेल्या चाहत्यांनी काही ठिकाणी घोषणाबाजी केली, तर काही ठिकाणी बाटल्या फेकल्याच्या घटना घडल्या. परिस्थिती चिघळू नये म्हणून पोलिसांना अतिरिक्त बंदोबस्त तैनात करावा लागला. काही वेळ तणावाचे वातावरण असले तरी नंतर परिस्थिती नियंत्रणात आणण्यात आली. या प्रकरणावर प्रतिक्रिया देताना पश्चिम बंगालच्या मुख्यमंत्री ममता बॅनर्जी यांनी सार्वजनिकपणे माफी मागत, चाहत्यांच्या भावना दुखावल्या गेल्याबद्दल खेद व्यक्त केला. कार्यक्रमातील नियोजनातील त्रुटींमुळे हा प्रकार घडल्याचे त्यांनी मान्य केले असून, मुख्य आयोजकाला पोलिसांनी ताब्यात घेतल्याची माहितीही प्रशासनाने दिली आहे. सध्या या संपूर्ण घटनेची चौकशी सुरू असून, पुढील कार्यक्रमांसाठी सुरक्षेच्या दृष्टीने विशेष काळजी घेण्याचे निर्देश देण्यात आले आहेत.   

 कोलकात्यातील गोंधळानंतर मेस्सी शनिवारी संध्याकाळी हैदराबादला पोहोचला. येथे मात्र व्यवस्था अत्यंत सकारात्मक आणि नियोजनबद्ध असल्याचे पाहायला मिळाले. हैदराबादमध्ये आयोजित एका विशेष कार्यक्रमात मेस्सीने लहान मुलांसोबत मैदानावर उतरून फुटबॉल खेळला. या वेळी मुलांचा उत्साह पाहून मेस्सीही भारावून गेला. फुटबॉल केवळ व्यावसायिक खेळ न राहता, पुढील पिढीपर्यंत पोहोचावा, यासाठी अशा उपक्रमांचे महत्त्व असल्याचे त्याने सूचक शब्दांत व्यक्त केल्याचे आयोजकांकडून सांगण्यात आले.           

हैदराबाद दौऱ्यादरम्यान मेस्सीने तेलंगणाचे मुख्यमंत्री रेवंत रेड्डी यांची सदिच्छा भेट घेतली. या भेटीत राज्यातील क्रीडा विकास, विशेषतः फुटबॉलसाठी असलेल्या संधींबाबत चर्चा झाली. मुख्यमंत्री रेड्डी यांनी मेस्सीचे स्वागत करत, भारतात फुटबॉल लोकप्रिय करण्यासाठी त्याची उपस्थिती प्रेरणादायी ठरेल, असे मत व्यक्त केले.     

दरम्यान, ताज्या माहितीनुसार, मेस्सीच्या पुढील कार्यक्रमांसाठी सुरक्षा यंत्रणा अधिक सतर्क करण्यात आली आहे. कोलकात्यात घडलेल्या घटनेनंतर मुंबई आणि नवी दिल्लीतील आयोजकांनी प्रेक्षक व्यवस्थापनात बदल करण्याचा निर्णय घेतला असून, प्रवेश, आसनव्यवस्था आणि गर्दी नियंत्रणासाठी अतिरिक्त उपाययोजना केल्या जात आहेत. १४ डिसेंबर रोजी मेस्सी मुंबईला भेट देणार असून, येथे तो निवडक चाहत्यांशी संवाद साधण्यासह एका विशेष कार्यक्रमात सहभागी होणार आहे. त्यानंतर १५ डिसेंबर रोजी नवी दिल्लीमध्ये त्याचा दौरा संपन्न होणार आहे.एकूणच, मेस्सीच्या भारत भेटीने देशातील फुटबॉलप्रेमींमध्ये नवचैतन्य निर्माण केले आहे. काही ठिकाणी झालेल्या गोंधळाच्या घटना वगळता, हा दौरा भारतीय फुटबॉलसाठी मैलाचा दगड ठरेल, अशी भावना क्रीडाविश्वात व्यक्त केली जात आहे.