गुलमर्ग गोंडोलामध्ये ३०० पर्यटक रोप वे मध्ये अडकले ; थरारक बचाव कार्यानंतर सर्वाची सुखरूप सुटका
गुलमर्ग गोंडोलामध्ये ३०० पर्यटक रोप वे मध्ये अडकले ; थरारक बचाव कार्यानंतर सर्वाची सुखरूप सुटका
गुलमर्ग : एन वाय नवा भारत डिजिटल न्यूज नेटवर्क
काश्मीरमधील प्रसिद्ध पर्यटन स्थळ असलेल्या गुलमर्ग गोंडोला रोप-वेमध्ये रविवारी दुपारी तांत्रिक बिघाड झाल्याने पर्यटकांचा मोठा जीव टांगणीला लागला होता. आशियातील सर्वात उंचावरील आणि लोकप्रिय असलेल्या या रोप-वेची सेवा दुपारी सव्वाच्या सुमारास अचानक बंद पडल्याने पर्यटकांमध्ये प्रचंड भीतीचे वातावरण निर्माण झाले होते. सुमारे ६५ केबिनमध्ये अडकलेल्या ३०० हून अधिक पर्यटकांना सुखरूप बाहेर काढण्यासाठी लष्कर, पोलीस आणि आपत्ती व्यवस्थापन पथकांनी राबवलेले हे बचाव कार्य तब्बल साडेसहा ते सात तास सुरू होते.
दुपारच्या वेळी गोंडोलाचे गिअरबॉक्स किंवा तांत्रिक यंत्रणेत बिघाड झाल्याने केबिन आकाशातच थांबल्या होत्या. हवामान खराब असल्याने आणि पाऊस कोसळत असल्याने बचाव कार्यासमोर मोठे आव्हान होते. काही केबिन जमिनीपासून ५०० फूट उंचीवर लटकत होत्या. भारतीय लष्कराचे जवान, जम्मू-काश्मीर पोलीस, एसडीआरएफ (SDRF) आणि एनडीआरएफ (NDRF) च्या पथकांनी अत्यंत कौशल्याने आणि जिद्दीने या मोहिमेत सहभाग घेतला. जवानांनी केबलच्या सहाय्याने एका केबिनपासून दुसऱ्या केबिनपर्यंत पोहोचून पर्यटकांना दोर आणि शिडीच्या मदतीने जमिनीवर आणले.
या घटनेची माहिती मिळताच जम्मू-काश्मीरचे मुख्यमंत्री ओमर अब्दुल्ला आणि नायब राज्यपाल मनोज सिन्हा यांनी परिस्थितीवर स्वतः लक्ष ठेवले होते. मुख्यमंत्र्यांनी या प्रकरणाची उच्चस्तरीय चौकशी करण्याचे आदेश दिले आहेत. या भीषण घटनेत कोणतीही जीवितहानी झाली नाही, ही सुदैवाची गोष्ट ठरली. प्रशासनाने तातडीने कार्यवाही करत सर्व पर्यटकांना रात्रीपर्यंत सुरक्षित स्थळी हलवले. सुरक्षिततेच्या कारणास्तव गुलमर्ग गोंडोला सेवा सोमवार आणि मंगळवारी दोन दिवस बंद ठेवण्याचा निर्णय घेण्यात आला असून, तांत्रिक त्रुटींची पूर्णपणे तपासणी केल्यानंतरच ही सेवा पुन्हा सुरू केली जाईल, असे प्रशासनाकडून स्पष्ट करण्यात आले आहे. या घटनेनंतर पर्यटकांच्या सुरक्षेबाबत आता पुन्हा एकदा गंभीर चर्चा सुरू झाली आहे.
