कर्नाल, हरियाणा येथील चर्चासत्रात क्षारपड मुक्तीच्या ‘श्री दत्त पॅटर्न’ ची यशोगाथा गणपतराव पाटील यांचे अनुभव ठरले जलसंपदा अधिकाऱ्यांना मोलाचे

कर्नाल, हरियाणा येथील चर्चासत्रात क्षारपड मुक्तीच्या ‘श्री दत्त पॅटर्न’ ची यशोगाथा

गणपतराव पाटील यांचे अनुभव ठरले जलसंपदा अधिकाऱ्यांना मोलाचे

शिरोळ एन वाय नवा भारत डिजिटल न्यूज नेटवर्क
भारतीय कृषी अनुसंधान संस्था दिल्ली व राष्ट्रीय मृदा लवणता अनुसंधान संस्था कर्नाल, हरियाणा यांच्या संयुक्त विद्यमाने कर्नाल येथे पाच दिवसीय चर्चासत्राचे आयोजन करण्यात आले आहे. या ठिकाणी श्री दत्त सहकारी साखर कारखान्याच्या वतीने राबविण्यात आलेल्या जमीन क्षारपड मुक्त दत्त पॅटर्न ची माहिती व अनुभव सांगण्यासाठी उद्यानपंडित गणपतराव पाटील यांना निमंत्रित करण्यात आले होते. यामध्ये गणपतराव पाटील यांनी श्री दत्त पॅटर्नचे जमीन क्षारपडमुक्तीसाठीचे फायदे, त्याची यशोगाथा सांगून राष्ट्रीय कृषी विकास योजनेमार्फत मिळालेल्या अनुदाना संदर्भातही सविस्तर माहिती दिली. जलसंपदा अधिकाऱ्यांना गणपतराव पाटील यांचे अनुभव मोलाचे ठरले.
महाराष्ट्र शासन जलसंपदा विभागामार्फत राज्यांमध्ये जमीन क्षारपड मुक्तीच्या संदर्भात काम केले जाणार आहे. यामध्ये शासनाचे 80 टक्के आणि शेतकऱ्यांची 20 टक्के रक्कम या आधारावर होणारे काम, याची माहिती अधिकारी, इंजिनियर यांना व्हावी यासाठी पाच दिवसीय प्रशिक्षणाचे आयोजन करण्यात आले आहे. यामध्ये गणपतराव पाटील हे प्रमुख मार्गदर्शक होते.
श्री दत्त पॅटर्न मध्ये पाणस्थळ आणि क्षारपड जमिनीमध्ये सुमारे दहा हजार एकरामध्ये सच्छिद्र पाईपलाईन निचरा प्रणालीच्या माध्यमातून केलेले यशस्वीरित्या काम आणि सुमारे चार हजार एकरावरती पिकांचे येत असलेले उत्पादन, जमीन क्षारपड मुक्तीसाठी गावांमधील शेतकरी एकत्रित येऊन संस्था स्थापन करून केलेल्या कामाचे यश, त्याचे फायदे, राष्ट्रीय कृषी विकास योजनेमार्फत 11 कोटी 46 लाखांचे अनुदान मिळवण्यासाठी शासन दरबारी केलेले प्रयत्न, आगामी काळात क्षारपड मुक्तीचे काम झाल्यास वापरात येणाऱ्या जमिनीमुळे होणारा आर्थिक आणि पर्यावरणीय फायदा, दत्त पॅटर्नच्या पद्धतीची उपयोगितता आणि यामध्ये येणाऱ्या अडचणी आणि त्यावर कशा पद्धतीने मात करता येते, सेंद्रिय कर्ब वाढीसाठीचे झालेले प्रयत्न, अशा विविध बाबींवर आपल्या अनुभवाच्या आधारे गणपतराव पाटील यांनी मार्गदर्शन केले. त्यांनी क्षारपडमुक्तीच्या कामाचा एक विस्तृत आढावा घेऊन सविस्तर माहिती दिली.
त्याचबरोबर कारखान्याचे मुख्य शेती अधिकारी श्रीशैल हेगाण्णा यांनी झालेल्या कामाचे व मिळालेल्या निष्कर्षांचे संगणकीय सादरीकरण केले.
यावेळी राष्ट्रीय मृदा लवणता अनुसंधान संस्था कर्नाल, हरियाणाचे डायरेक्टर डॉ. आर. के. यादव, डॉ. बुंदेला यांच्यासह दत्त कारखान्याचे संचालक इंद्रजीत पाटील, कीर्तीवर्धन मरजे आदी मान्यवर उपस्थित होते.