बिथरलेल्या बिबट्याच्या बछड्याचा लोकांवर हल्ल्याचा प्रयत्न: एकजण जखमी; वनविभागाकडून ड्रोनद्वारे शोधमोहीम पन्हाळ्याच्या पायथ्याशी घडली घटना

बिथरलेल्या बिबट्याच्या बछड्याचा लोकांवर हल्ल्याचा प्रयत्न- एकजण जखमी वनविभागाकडून ड्रोनद्वारे शोधमोहीम पन्हाळ्याच्या पायथ्याशी घडली घटना. 

पन्हाळा :एन वाय नवा भारत डिजिटल न्यूज नेटवर्क

गुरुवारी पन्हाळगडाच्या पायथ्याशी आपटी पैकी सोमावरपेठेत भरवस्तीत नर बिबट्याच्या हल्ल्यात बिबट्याच्या बछड्याचा मृत्यू झाला होता तेव्हा हल्ल्यामुळे कुटुंबापासून विभक्त झालेल्या व त्यामुळे बिथरलेल्या बिबट्याच्या बछड्याने पन्हाळगडाच्या पायथा परिसरातील लोकांवर हल्ला केला असून त्याने आत्ता पर्यंत पाच ते सहा लोकांना जखमी करण्याचा प्रयत्न केला आहे त्यामध्ये एकजण गंभीर जखमी झाला असून वन विभागाने ड्रोनद्वारे बछड्याची शोध मोहीम चालू केली आहे.

याबाबत घटना स्थळ व वनविभागाकडून मिळालेली माहिती अशी,पन्हाळगडाच्या उत्तरेकडील पायथा परिसरात गेली सहा ते आठ महिन्यापासून एक बिबट्या मादी दोन बछड्यासह वावर होता. या परिसरात असलेल्या गावातील लोकांनी या कुटुंबाला अनेकवेळा प्रत्यक्ष पाहिले होते. गुरुवारी आपटी पैकी सोमावरपेठेच्या भरवस्तीत याच कुटुंबातील एका बछड्याचा मृतदेह आढळला होता. या मृतदेहाचे शवविच्छेदन केल्या नंतर त्याचा मृत्यू नर बिबट्याच्या हल्ल्यात झाल्याचे निष्पन्न झाले होते. त्या हल्ल्यामागचे कारण शोधले असता, कुटुंबातील मादी बिबट्याशी मिलनोत्सुक झालेल्यामुळे नाराकडून हल्ला झाला असण्याची शक्यता वनविभागाने वर्तवलेली आहे. मात्र या हल्ल्यामुळे ते कुटुंब विखूरले असून आई आणि बहिणीच्या विरहाने बिथरलेल्या बिबट्याच्या बछड्याने परिसरात धुमाकूळ घालण्यास सुरवात केली आहे. त्याने गुरुवारी रात्री अजय आनंदा जाधव (वय वर्ष २५ रा. बादेवाडी ) व विकास बाळू डावरे ( वय वर्षे ४८ रा. जिऊर) याचेवर हल्ला केला. यामध्ये अजय जाधव यांच्या पायाला बिबट्याने ओरखडल्याने ते जखमी झाले. तर शुक्रवारी सकाळी आपटी गावाचे हद्दीतील गणपती मंदिरा जवळ राम तानाजी गावडे ( वय वर्षे ३० रा. जिऊर) व गीता रामराव गिरीगोसावी ( वय वर्षे ४३ रा. आपटी) यांचा पाठलाग केला.तसेच दुपारी जयवंत गोविंद डावरे ( वय वर्षे ६० रा. जिऊर) यांचेवर हल्ला केला. बचाव पथक ड्रोनद्वारे बछड्याचा शोध घेत आहे.परिक्षेत्र वनाधिकारी पन्हाळा अजित माळी यांचे उपस्थितीत चालू असलेल्या या शोध मोहिमेत वन्यजीव बचाव पथक कोल्हापूर व पन्हाळा यांचे सह वनपाल सागर पटकारे, वनरक्षक संदिप पाटील, पोलिस पाटील रघुनाथ बुचडे सहभागी झाले होते.