नीट’ पेपरफुटी प्रकरण : शिवराज मोटेगावकरला ९ दिवसांची सीबीआय कोठडी

नीट’ पेपरफुटी प्रकरण : शिवराज मोटेगावकरला ९ दिवसांची सीबीआय कोठडी; १०० कोटींच्या उलाढालीमुळे आता ‘ईडी’चीही एन्ट्री

​विशेष प्रतिनिधी, लातूर : एन वाय नवा भारत डिजिटल न्यूज नेटवर्क

देशभरात प्रचंड खळबळ उडवून देणाऱ्या ‘नीट’ (NEET-UG) परीक्षा पेपरफुटी प्रकरणाचे धागेदोरे आता महाराष्ट्रात पूर्णपणे घट्ट झाले असून, लातूरमधील प्रसिद्ध ‘आरसीसी’ (RCC) कोचिंग क्लासेसचे संचालक शिवराज रघुनाथ मोटेगावकर याला केंद्रीय अन्वेषण विभागाने (सीबीआय) अटक केली आहे. सोमवारी दिल्लीतील विशेष सीबीआय न्यायालयाने आरोपी मोटेगावकरला २७ मे पर्यंत, म्हणजेच तब्बल ९ दिवसांची सीबीआय कोठडी सुनावली आहे. या प्रकरणातील मोठ्या आर्थिक गैरव्यवहाराची आणि ‘आरसीसी’च्या सुमारे १०० कोटी रुपयांच्या वार्षिक उलाढालीची दखल घेत आता सक्तवसुली संचालनालयाने (ईडी) देखील या तपासात उडी घेतली आहे. त्यामुळे मोटेगावकरच्या अडचणीत कमालीची वाढ झाली आहे.

​१० दिवस आधीच मोबाईलवर आली होती प्रश्नपत्रिका

सीबीआयने न्यायालयासमोर सादर केलेल्या प्राथमिक चौकशीच्या अहवालात अत्यंत धक्कादायक खुलासे झाले आहेत. ३ मे रोजी होणाऱ्या नीट परीक्षेची प्रश्नपत्रिका आणि उत्तरपत्रिका शिवराज मोटेगावकरकडे तब्बल १० दिवस आधी, म्हणजेच २३ एप्रिल रोजीच हस्तगत झाली होती. त्याच्या वैयक्तिक मोबाईल फोनच्या तपासणी दरम्यान सीबीआयला ही लीक झालेली प्रश्नपत्रिका आढळून आली आहे. हा पेपर त्याने अनेक विद्यार्थ्यांना हस्तलिखित नोट्सच्या स्वरूपात पुरवला होता आणि परीक्षा संपताच पुरावे नष्ट करण्याच्या हेतूने या नोट्स जाळून टाकण्यात आल्याची माहिती तपासात समोर आली आहे. या संघटित टोळीचा मुख्य सूत्रधार आणि रसायनशास्त्राचे निवृत्त प्राध्यापक पी. व्ही. कुलकर्णी यांच्याशी मोटेगावकर थेट संपर्कात होता, असे सीबीआयचे तपास अधिकारी पवन कौशिक यांनी न्यायालयाला सांगितले.

​लातुरात सीबीआयचे धाडसत्र आणि ‘ईडी’चा ससेमिरा

गेल्या चार दिवसांपासून २८ अधिकाऱ्यांचे सीबीआयचे पथक लातूरमध्ये ठाण मांडून आहे. रविवारी रात्री उशिरा सीबीआयच्या ४ सदस्यीय पथकाने मोटेगावकरच्या लातूर येथील शिकवणी वर्गाच्या कार्यालयावर आणि सुतमील परिसरातील निवासस्थानी अचानक छापे टाकले. या कारवाई दरम्यान अनेक महत्त्वाची कागदपत्रे, विद्यार्थ्यांच्या नोंदी, संगणक आणि डिजिटल पुरावे जप्त करण्यात आले आहेत. दरम्यान, या क्लासेसच्या माध्यमातून गोळा झालेला अफाट पैसा आणि संस्थापकाची गडगंज संपत्ती पाहता, काळ्या पैशाचा पांढरा करण्याचा संशय बळावला आहे. याच पार्श्वभूमीवर ‘ईडी’ने (ED) मनी लाँड्रिंग कायद्यांतर्गत समांतर तपास सुरू केला असून, मोटेगावकरच्या आर्थिक साम्राज्याची झाडाझडती सुरू झाली आहे. या कारवाईमुळे लातूरच्या शैक्षणिक वर्तुळात आणि इतर मोठ्या शिकवणी चालकांमध्ये प्रचंड खळबळ उडाली असून, खबरदारीचा उपाय म्हणून शहरात मोठा पोलीस बंदोबस्त तैनात करण्यात आला आहे.