होर्मुझ समुद्रधुनीवरून अमेरिका-इराणमध्ये संघर्ष तीव्र

आंतरराष्ट्रीय : एन वाय नवा भारत डिजिटल न्यूज नेटवर्क

होर्मुझ ‘समुद्रधुनीवरून ‘ अमेरिका-इराणमध्ये संघर्ष तीव्र; अमेरिकेची नाकेबंदी तर इराणचे आक्रमक प्रत्युत्तर

​होर्मुझ समुद्रधुनीवरून येथून जाणाऱ्या व्यावसायिक जहाजांवरील हल्ल्यांच्या पार्श्वभूमीवर अमेरिका आणि इराणमधील तणाव आता युद्धाच्या उंबरठ्यावर पोहोचला आहे. या भागातील हालचालींवर नियंत्रण मिळवण्यासाठी अमेरिकेने पुन्हा एकदा इराणच्या बंदरांची नाकेबंदी करण्यास सुरुवात केली आहे. अमेरिकेचे अध्यक्ष डोनाल्ड ट्रम्प यांनी स्पष्ट शब्दांत तेहरानला इशारा दिला आहे की, होर्मुझचा मार्ग जगासाठी खुला राहील, परंतु तो इराणसाठी बंद असेल. अमेरिकेने आता थेट लष्करी आक्रमक पवित्रा घेत इराणमधील वीज प्रकल्प आणि पुलांना लक्ष्य करण्याची धमकी दिली आहे.

 ​एका दूरचित्रवाणी मुलाखतीदरम्यान बोलताना अध्यक्ष ट्रम्प यांनी तेहरानवर गंभीर आरोप केले. इराणने नेहमीच अण्वस्त्रांचा हव्यास धरला असून, प्रत्येक वेळी त्यांनी केलेले करार मोडीत काढले आहेत, असे ट्रम्प यांनी म्हटले. जोपर्यंत इराण चर्चेच्या टेबलावर येत नाही, तोपर्यंत अमेरिकेचे हल्ले सुरूच राहतील आणि त्याची तीव्रता दररोज वाढत जाईल, असा सज्जड दमही त्यांनी दिला. इराणने एकतर वाटाघाटीचा मार्ग निवडावा किंवा परिणामांना सामोरे जावे, असा अंतिम इशारा त्यांनी दिला आहे.

 ​या अमेरिकन आक्रमकतेच्या पार्श्वभूमीवर इराणच्या इस्लामिक रिव्होल्यूशनरी गार्ड कॉर्प्सने (आयआरजीसी) आक्रमक पवित्रा घेत प्रत्युत्तर दिले आहे. इराणने बहरीन आणि कुवेत येथील तळांना लक्ष्य करून मोठ्या प्रमाणावर ड्रोन आणि क्षेपणास्त्र हल्ले केले आहेत. आयआरजीसीच्या दाव्यानुसार, बहरीनमधील शेख ईसा तळावर केलेल्या एकाच वेळी झालेल्या क्षेपणास्त्र आणि ड्रोन हल्ल्यात अमेरिकेची महत्त्वाची शस्त्रे आणि सुट्या भागांचे स्टोरेज शेड पूर्णपणे नष्ट करण्यात आले आहेत.

 ​केवळ बहरीनच नव्हे, तर इराणने कुवेतवरही प्रहार केल्याचा दावा केला आहे. कुवेतमधील अली सलेम हवाई तळावर अमेरिकेचे एमक्यू-९ ड्रोन तैनात होते. आयआरजीसीने तेथे हल्ला करून ड्रोन तैनात असणारा रॅम्प उद्ध्वस्त केला आणि अनेक ड्रोन नष्ट केल्याचे सांगितले आहे. मध्यपूर्वेतील या वाढत्या लष्करी संघर्षामुळे जागतिक स्तरावर चिंतेचे वातावरण निर्माण झाले असून, त्याचा परिणाम कच्च्या तेलाच्या पुरवठ्यावर आणि आंतरराष्ट्रीय व्यापारावर होण्याची भीती व्यक्त केली जात आहे. दोन्ही देशांमधील हा संघर्ष आता केवळ होर्मुझपुरता मर्यादित न राहता संपूर्ण आखाती प्रदेशात पसरला असल्याने जागतिक शक्तींनी याकडे गांभीर्याने पाहण्यास सुरुवात केली आहे.