आखातात युद्धाची ठिणगी: इराणवर अमेरिकेचा भीषण प्रतिहल्ला

आखातात युद्धाची ठिणगी: इराणवर अमेरिकेचा भीषण प्रतिहल्ला; प्रत्युत्तरादाखल इराणकडून आखाती देशांवर मिसाईलचा वर्षाव

आंतरराष्ट्रीय : एन वाय नवा भारत डिजिटल न्यूज नेटवर्क

मध्यपूर्वेत पुन्हा एकदा युद्धाचे ढग गडद झाले असून, अमेरिका आणि इराण यांच्यातील संघर्ष आता टोकाला पोहोचला आहे. होर्मुझच्या सामुद्रधुनीमध्ये एका व्यापारी जहाजावर झालेल्या भीषण हल्ल्याचे तीव्र पडसाद उमटले असून, अमेरिकेने इराणवर जोरदार हवाई हल्ले केले आहेत. या कारवाईनंतर इराणनेही आक्रमक पवित्रा घेत आखाती देशांना लक्ष्य केल्याने संपूर्ण प्रदेशात तणावाची स्थिती निर्माण झाली आहे. या संघर्षाने जागतिक राजकारणात खळबळ उडवून दिली असून, भविष्यातील परिणामांबाबत चिंता व्यक्त केली जात आहे.

​होर्मुझच्या सामुद्रधुनीमध्ये एका व्यापारी जहाजाला लक्ष्य करून त्याला आगीच्या भक्ष्यस्थानी ढकलण्यात आले होते. या घटनेत जहाजावरील कर्मचाऱ्यांना जीव वाचवण्यासाठी समुद्रात उड्या मारणे भाग पडले. या आक्रमक कृत्यामुळे संतप्त झालेल्या अमेरिकेने इराणच्या भूमीवर थेट कारवाईचा निर्णय घेतला. अमेरिकेच्या सेंट्रल कमांडने दिलेल्या माहितीनुसार, त्यांनी इराणमधील सुमारे १४० लष्करी तळांवर भीषण एअर स्ट्राईक केले आहेत. यामध्ये प्रामुख्याने इराणची क्षेपणास्त्र केंद्रे, ड्रोन फॅसिलिटी आणि दळणवळण यंत्रणा उद्ध्वस्त करण्यात आल्याचा दावा अमेरिकेने केला आहे.

​अमेरिकेच्या या मोठ्या कारवाईनंतर इराणनेही गप्प न बसता आक्रमक प्रत्युत्तर दिले आहे. इराणने आपली क्षेपणास्त्रे आणि ड्रोन आखाती देशांच्या दिशेने डागली असून, यामध्ये बहरीन, कुवेत, कतार आणि संयुक्त अरब अमिराती (युएई) हे देश लक्ष्य झाले आहेत. या हल्ल्यांनंतर संबंधित देशांच्या सुरक्षा यंत्रणा सक्रिय झाल्या असून, कतार आणि कुवेतने त्यांच्या हद्दीत आलेल्या क्षेपणास्त्रांना हवेतच नष्ट केल्याचा दावा केला आहे. दुसरीकडे बहरीनमध्येही क्षेपणास्त्र हल्ल्याचा इशारा देण्यात आला होता. केवळ आखाती देशच नव्हे, तर जॉर्डनमधील अमेरिकन लष्करी तळावरही इराणने हल्ले केल्याचा दावा तेहरानकडून करण्यात आला आहे.

​या घटनाक्रमामुळे संपूर्ण मध्यपूर्वेतील शांतता धोक्यात आली आहे. दोन्ही देशांकडून होत असलेल्या या तीव्र हल्ल्यांमुळे युद्धाचा भडका उडण्याची शक्यता वर्तवण्यात येत आहे. जागतिक स्तरावर या घडामोडींकडे अत्यंत चिंतेने पाहिले जात असून, या संघर्षाचा परिणाम कच्च्या तेलाच्या किमती आणि आंतरराष्ट्रीय सुरक्षेवर होण्याचे संकेत मिळत आहेत. येणाऱ्या काळात दोन्ही देश कोणता पवित्रा घेतात आणि अमेरिका व इराणमधील हा संघर्ष कुठे थांबतो, यावर आता संपूर्ण जगाचे लक्ष लागले आहे.