शिक्षण क्षेत्रातील ‘नोबेल’वर भारताची मोहोर: मुंबईच्या रुबल नागी यांना १० लाख डॉलर्सचा ‘ग्लोबल टीचर पुरस्कार प्रदान
शिक्षण क्षेत्रातील ‘नोबेल’वर भारताची मोहोर: मुंबईच्या रुबल नागी यांना १० लाख डॉलर्सचा ‘ग्लोबल टीचर पुरस्कार प्रदान
दुबई /एन वाय नवा भारत डिजिटल न्यूज नेटवर्क
भारतीय कलावंत आणि शिक्षिका रुबल नागी यांनी २०२६ चा प्रतिष्ठित ‘ग्लोबल टीचर प्राईज’ पटकावून जागतिक स्तरावर भारताचा गौरव वाढवला आहे. दुबई येथे पार पडलेल्या ‘वर्ल्ड गव्हर्नमेंट समिट’मध्ये त्यांना १० लाख डॉलरचा (सुमारे ८ कोटींहून अधिक रुपये) हा पुरस्कार प्रदान करण्यात आला. दुबईचे क्राऊन प्रिन्स शेख हमदान बिन मोहम्मद बिन रशीद अल मक्तूम यांच्या हस्ते हा सन्मान देण्यात आला. रुबल नागी या पुरस्काराच्या १० व्या मानकरी ठरल्या आहेत.
रुबल नागी यांनी गेल्या दोन दशकांपासून ‘लिव्हिंग वॉल्स ऑफ लर्निंग’ या अभिनव संकल्पनेद्वारे दुर्लक्षित वस्त्यांमधील आणि ग्रामीण भागातील मुलांच्या आयुष्यात मोठा बदल घडवून आणला आहे. त्यांनी झोपडपट्ट्यांमधील भिंतींचे रूपांतर शैक्षणिक भित्तिचित्रांमध्ये केले, ज्यामुळे मुले चालता-बोलता वाचन, लेखन आणि अंकगणिताचे धडे गिरवू लागली. त्यांच्या या उपक्रमामुळे आजवर १० लाखाहून अधिक मुले औपचारिक शिक्षणाच्या मुख्य प्रवाहात सामील झाली आहेत.
रुबल नागी आर्ट फाउंडेशन’च्या माध्यमातून त्यांनी संपूर्ण भारतात ८०० हून अधिक शिक्षण केंद्रे उभारली आहेत. ही केंद्रे १०० हून अधिक कमी उत्पन्न असलेल्या समुदायांमध्ये कार्यरत आहेत. केवळ पुस्तकी ज्ञानच नव्हे, तर मुलांचे मानसिक आरोग्य आणि त्यांच्या सर्जनशीलतेला वाव देण्यासाठी ही केंद्रे काम करतात. त्यांच्या या शिक्षण पद्धतीमुळे शाळा गळतीचे प्रमाण ५० टक्क्यांनी कमी झाले असून, मुलांच्या उपस्थितीत मोठी वाढ झाली आहे.
या जागतिक स्पर्धेसाठी १३९ देशांतून सुमारे ५,००० नामांकनं आली होती, ज्यातून रुबल यांची निवड करण्यात आली. पुरस्कारासाठी मिळालेल्या १० लाख डॉलर्सच्या निधीचा उपयोग रुबल नागी एक मोफत व्यावसायिक प्रशिक्षण संस्था (Vocational Institute) उभारण्यासाठी करणार आहेत. या संस्थेत गरजू तरुणांना डिजिटल साक्षरता आणि विविध कौशल्ये शिकवली जातील, जेणेकरून त्यांना भविष्यात रोजगाराच्या चांगल्या संधी मिळतील.
हा पुरस्कार ‘जेम्स एज्युकेशन’ आणि ‘वार्की फाउंडेशन’तर्फे युनेस्कोच्या सहकार्याने दिला जातो. रुबल नागी यांचे हे यश केवळ त्यांचे वैयक्तिक यश नसून, ते भारतातील प्रत्येक मुलाच्या स्वप्नांचा आणि जिद्दीचा सन्मान आहे.
