धक्कादायक! महिला वकिलावर पतीकडून खुनी हल्ला; सर्वोच्च न्यायालयाने घेतली अमानुष मारहाणीची ‘सुमोटो’ दखल
धक्कादायक! महिला वकिलावर पतीकडून खुनी हल्ला; सर्वोच्च न्यायालयाने घेतली अमानुष मारहाणीची ‘सुमोटो’ दखल
दिल्ली:एन वाय नवा भारत डिजिटल न्यूज नेटवर्क
दिल्लीतील कडकडुमा न्यायालयात (Karkardooma Court) प्रॅक्टिस करणाऱ्या एका महिला वकिलावर त्यांच्या पतीने तलवारीने अमानुष हल्ला केल्याची घटना एप्रिल २०२६ मध्ये घडली होती. या प्रकरणाची सर्वोच्च न्यायालयाने (Supreme Court) स्वतःहून दखल घेतली असून या प्रकरणाची अत्यंत गंभीर दखल घेत सर्वोच्च न्यायालयाने आज (सोमवारी) स्वतःहून (सुओ मोटो) जनहित याचिका दाखल करून घेतली. मुख्य न्यायमूर्ती सूर्यकांत आणि न्यायमूर्ती जे. जोयमाल्य बागची यांच्या खंडपीठाने या प्रकरणी दिल्ली पोलीस आयुक्तांना तपासाचे विशेष आदेश दिले आहेत.
मिळालेल्या माहितीनुसार, पीडित महिला वकील दिल्लीतील कडकडडूमा न्यायालयात सराव करते. संशयित आरोपी पती मनोज कुमार याने २२ एप्रिल रोजी आपल्या पत्नीवर सोनिया विहार येथील कार्यालयात धारदार शस्त्राने अनेक वार केले. या हल्ल्यात महिला गंभीर जखमी झाली असून तिच्यावर सध्या एम्स (AIIMS) ट्रॉमा सेंटरमध्ये उपचार सुरू आहेत. या घटनेची माहिती ॲडव्होकेट स्नेहा कलिता यांनी पत्राद्वारे सरन्यायाधीशांना दिली होती, ज्यासोबत पीडितेचे रक्ताळलेले फोटोही जोडण्यात आले होते.
हल्ल्यानंतर जखमी महिला मदतीसाठी धडपडत असताना तिला जीटीबी, आरके आणि कैलाश यांसारख्या रुग्णालयांनी दाखल करून घेण्यास नकार दिल्याचा खळबळजनक आरोप करण्यात आला आहे. यावर सर्वोच्च न्यायालयाने तीव्र संताप व्यक्त केला. “आणीबाणीच्या परिस्थितीत उपचारासाठी आलेल्या रुग्णाला रुग्णालयांनी का नाकारले?” असा सवाल करत न्यायालयाने या प्रकरणाची चौकशी करण्याचे आदेश दिले आहेत. भारतीय कायद्यानुसार कोणतीही संस्था तातडीच्या उपचारांना नकार देऊ शकत नाही, हे न्यायालयाने पुन्हा एकदा ठणकावून सांगितले.
घटनेनंतर आरोपी पतीने दोन लहान मुलींना पळवून नेल्याची माहिती समोर आली आहे. न्यायालयाने पोलिसांना तातडीने या मुलींचा शोध घेण्याचे निर्देश दिले असून, ज्येष्ठ मुलीची सुरक्षा आईच्या माहेरच्यांकडे सोपवली आहे. तसेच, पीडितेची हलाखीची आर्थिक स्थिती पाहता ‘नाल्सा’ला (NALSA) तातडीने अंतरिम नुकसान भरपाई आणि वैद्यकीय खर्चासाठी मदत देण्याचे आदेश दिले आहेत.
तपास महिला अधिकाऱ्याकडे: न्यायालयाने दिल्ली पोलीस आयुक्तांना या प्रकरणाचा तपास एखाद्या वरिष्ठ पोलीस अधिकाऱ्याकडे, विशेषतः महिला एसीपी किंवा डीसीपी दर्जाच्या अधिकाऱ्याकडे सोपवण्याचे आदेश दिले आहेत. आरोपी मनोज कुमारला अटक करण्यात आली असून, या गुन्ह्यात सहभागी असलेल्या अन्य संशयितांचा शोध सुरू आहे. कौटुंबिक वादातून हा हल्ला झाल्याचे प्राथमिक तपासात निष्पन्न झाले आहे.
या प्रकरणाच्या माध्यमातून सर्वोच्च न्यायालयाने घरगुती हिंसाचार आणि अशा संकटसमयी आरोग्य व्यवस्थेचे असलेले अपयश या दोन्ही गंभीर मुद्द्यांवर कडक भूमिका घेतली आहे. पुढील सुनावणीत पोलीस आणि रुग्णालयांच्या भूमिकेबाबत सविस्तर अहवाल सादर करावा लागणार आहे.
