एप्रिलमधील वाहन विक्रीत टॉप टेन मध्ये मारुतीच्या ६ गाड्या; टाटा-महिंद्राही शर्यतीत!
ऑटो न्यूज: एन वाय नवा भारत डिजिटल न्यूज नेटवर्क
एप्रिलमधील वाहन विक्रीत टॉप टेन मध्ये मारुतीच्या ६ गाड्या; टाटा-महिंद्राही शर्यतीत!
पुणे/मुंबई: वृत्तसंस्था
भारतीय वाहन उद्योगासाठी एप्रिल २०२६ हा महिना बदलाचे वारे घेऊन आला आहे. दरवर्षीप्रमाणे मारुती सुझुकीने विक्रीच्या आकड्यांत आपले वर्चस्व राखले असले तरी, ग्राहकांच्या पसंतीचा कल आता ‘सेफ्टी’ आणि ‘एसयुव्ही’कडे वेगाने झुकत असल्याचे चित्र स्पष्ट झाले आहे. या महिन्यात मारुती सुझुकीची ‘डिझायर’ ही गाडी देशातील सर्वाधिक विक्री होणारी कार ठरली आहे. नव्या ढंगात आलेल्या डिझायरने तब्बल २१,५०० हून अधिक गाड्यांच्या विक्रीचा टप्पा पार करत ३७ टक्क्यांची वार्षिक वाढ नोंदवली आहे. विशेषतः या गाडीच्या सीएनजी मॉडेलला मध्यमवर्गीयांनी दिलेली पसंती निर्णायक ठरली.
दुसरीकडे, देशी बनावटीच्या टाटा मोटर्सने जागतिक कंपन्यांना घाम फोडला आहे. टाटाची ‘पंच’ ही छोटी एसयुव्ही २०,८०० गाड्यांच्या विक्रीसह दुसऱ्या स्थानावर राहिली असून, तिने १८ टक्क्यांची आश्वासक वाढ मिळवली आहे. त्यापाठोपाठ टाटा ‘नेक्सॉन’नेही १९,५०० आकड्यांसह तिसरे स्थान पटकावले आहे. सुरक्षिततेच्या रेटिंगमध्ये अव्वल असलेल्या या गाड्यांनी मध्यमवर्गीय कुटुंबांचा विश्वास संपादन केल्याचे यावरून दिसून येते.
मारुतीच्या फॅमिली कार मानल्या जाणाऱ्या ‘वॅगनआर’ आणि ‘बलेनो’ यांनी अनुक्रमे चौथे आणि सातवे स्थान राखले आहे. मात्र, वॅगनआरच्या विक्रीत गेल्या वर्षाच्या तुलनेत एक टक्क्याची किरकोळ घट पाहायला मिळाली. ह्युंदाईची ‘क्रेटा’ ही आजही प्रीमियम एसयुव्ही सेगमेंटमध्ये लोकांची पहिली पसंती असून १७,२०० गाड्यांच्या विक्रीसह ती पाचव्या क्रमांकावर आहे. या गाडीनेही आपले स्थान टिकवून ठेवले असले तरी वार्षिक विक्रीत एक टक्क्याची घट झाली आहे.
सातत्याने मागणीत असलेल्या मारुती ‘एर्टिगा’ने १७,००० गाड्यांच्या विक्रीसह सहाव्या क्रमांकावर झेप घेतली असून, ही गाडी आजही मोठ्या कुटुंबांसाठी पहिली पसंती ठरत आहे. तर मारुतीचीच कॉम्पॅक्ट एसयुव्ही ‘ब्रेझा’ आठव्या स्थानावर राहिली आहे. ब्रेझाच्या विक्रीत अडीच टक्क्यांची घट झाली असली तरी १६,१०० चा आकडा पार करत तिने आपले स्थान पहिल्या १० मध्ये कायम ठेवले आहे.
या यादीत सर्वात महत्त्वाची कामगिरी ‘मारुती फ्रॉन्क्स’ने केली आहे. आपल्या वेगळ्या डिझाइनमुळे तरुणाईला आकर्षित करणाऱ्या या गाडीने १५,५०० युनिट्सची विक्री करत १४ टक्क्यांची वाढ नोंदवली आणि नववे स्थान पटकावले. यादीच्या शेवटच्या पायरीवर महिंद्राची ‘स्कॉर्पिओ’ (एन आणि क्लासिक मिळून) १४,६०० गाड्यांच्या विक्रीसह विराजमान आहे. महिंद्राने ५ टक्क्यांच्या वाढीसह आपले स्थान पक्के केले असून, रफ-अँड-टफ गाड्यांच्या शौकीनांमध्ये स्कॉर्पिओची क्रेझ आजही कायम असल्याचे दिसते.
एकूणच एप्रिल महिन्याचा कल पाहता, ग्राहकांचा कल आता केवळ स्वस्त गाड्यांकडे नसून, सुरक्षितता आणि आधुनिक तंत्रज्ञानाकडे वळला आहे. टॉप १० पैकी ६ गाड्या मारुतीच्या असल्या तरी, टाटा आणि महिंद्राने मिळवलेली वाढ ही भारतीय वाहन उद्योगाच्या बदलत्या मानसिकतेचे प्रतीक आहे. वाढती महागाई आणि कर्जाचे चढे दर असूनही, वैयक्तिक प्रवासासाठी गाड्यांची मागणी कायम राहणे ही अर्थव्यवस्थेसाठी जमेची बाजू मानली जात आहे.
एप्रिल महिन्यात विकल्या गेलेल्या टॉप 10 कार
१ मारुती सुझुकी डिझायर २१,५००+ ३७% वाढ (YoY)
२ टाटा पंच २०,८००+ १८% वाढ (YoY)
३ टाटा नेक्सॉन १९,५००+ २१% वाढ (YoY)
४ मारुती सुझुकी वॅगनआर १७,५००+ १% घट (YoY)
५ ह्युंदाई क्रेटा १७,२००+ १% घट (YoY)
६ मारुती सुझुकी एर्टिगा १७,०००+ २% वाढ (YoY)
७ मारुती सुझुकी बलेनो १६,४००+ ३२% वाढ (YoY)
८ मारुती सुझुकी ब्रेझा १६,१००+ २.५% घट (YoY)
९ मारुती सुझुकी फ्रॉन्क्स १५,५००+ १४% वाढ (YoY)
१० महिंद्रा स्कॉर्पिओ (N + Classic) १४,६००+
