मेस्सीचा महाविक्रम! क्लोज आणि मार्ताला मागे टाकत फुटबॉलच्या इतिहासात कोरले सुवर्णअक्षरांनी नाव
क्रीडा: एन वाय नवा भारत डिजिटल न्यूज नेटवर्क
मेस्सीचा महाविक्रम ! क्लोज आणि मार्ताला मागे टाकत फुटबॉलच्या इतिहासात कोरले सुवर्णअक्षरांनी नाव
डॅलस (टेक्सास): वृत्तसंस्था
फुटबॉल विश्वातील महान खेळाडू लिओनेल मेस्सी याने आंतरराष्ट्रीय स्तरावर आणखी एक अजरामर कीर्ती प्रस्थापित केली आहे. चालू फिफा विश्वचषक २०२६ स्पर्धेत ऑस्ट्रियाविरुद्धच्या सामन्यात दोन गोल डागत मेस्सीने पुरुषांच्या आणि महिलांच्या फुटबॉल इतिहासातील सर्वकालीन सर्वाधिक गोलचा विश्वविक्रम आपल्या नावावर केला आहे. या ऐतिहासिक कामगिरीसह मेस्सीच्या नावावर आता विश्वचषक इतिहासात तब्बल १८ गोलची नोंद झाली आहे.
डॅलस येथील स्टेडियमवर काल रात्री रंगलेल्या ग्रूप-जे मधील चुरशीच्या सामन्यात अर्जेंटिनाने ऑस्ट्रियाचा २-० अशा फरकाने पराभव केला. या विजयासह अर्जेंटिनाने दिमाखात बाद फेरीत (अंतिम ३२) प्रवेश केला आहे. या सामन्याचे संपूर्ण आकर्षण कर्णधार लिओनेल मेस्सी हाच होता. वयाची ३८ वर्षे पूर्ण करून अवघ्या दोन दिवसांत ३९ व्या वर्षात पाऊल ठेवणाऱ्या मेस्सीने मैदानावर तरुणालाही लाजवेल असा खेळ केला.
सामन्याच्या सुरुवातीला नवव्या मिनिटाला अर्जेंटिनाला पेनल्टी किकची सुवर्णसंधी मिळाली होती, मात्र मेस्सीचा हा शॉट गोलपोस्टच्या बाहेर गेल्याने स्टेडियममध्ये काही काळ शांतता पसरली होती. परंतु, या अपयशाने खचून न जाता मेस्सीने ३८ व्या मिनिटाला थियागो अल्माडाच्या अप्रतिम पासवर २० यार्डांवरून एक मैदानी गोल करत संघाचे खाते उघडले. हा त्याचा विश्वचषकातील १७ वा गोल होता. या गोलसह त्याने जर्मनीचा दिग्गज स्ट्रायकर मिरोस्लाव क्लोज (१६ गोल) आणि महिला फुटबॉलमधील ब्राझीलची महान खेळाडू मार्ता (१७ गोल) या दोघांचेही विक्रम इतिहासजमा केले.
त्यानंतर सामन्याच्या शेवटच्या क्षणी, म्हणजेच इंज्युरी टाईममध्ये (९०+५ व्या मिनिटाला) ऑस्ट्रियन बचावपटूंच्या गराड्यातून मार्ग काढत मेस्सीने सामन्यातील आणि आपल्या कारकिर्दीतील १८ वा विक्रमी गोल केला. या स्पर्धेतील पहिल्या सामन्यात अल्जेरियाविरुद्ध हॅट्ट्रिक घेणाऱ्या मेस्सीने आता चालू विश्वचषकात अवघ्या दोन सामन्यांत ५ गोल केले आहेत.
विशेष म्हणजे, ज्या दिवशी मेस्सीने हा इतिहास रचला, त्याच दिवशी ठीक ४० वर्षांपूर्वी म्हणजेच २२ जून १९८६ रोजी अर्जेंटिनाचे दुसरे दिवंगत महान फुटबॉलपटू दिएगो माराडोना यांनी इंग्लंडविरुद्धच्या ऐतिहासिक सामन्यात ‘हँड ऑफ गॉड’ आणि ‘शतकातील सर्वोत्तम गोल’ केला होता. त्याच ऐतिहासिक दिवशी मेस्सीने विश्वचषक इतिहासातील सर्वोच्च गोलंदाज बनण्याचा मान मिळवला आहे.
या जागतिक विक्रमानंतर संपूर्ण क्रीडा विश्वातून मेस्सीवर कौतुकाचा वर्षाव होत आहे. विश्वविजेत्या अर्जेंटिनाची पुढील लढत आता जॉर्डनविरुद्ध होणार आहे.
