उपजिल्हा रुग्णालय गारगोटी येथे जागतिक योग दिन उत्साहात साजरा

उपजिल्हा रुग्णालय गारगोटी येथे जागतिक योग दिन उत्साहात साजरा

गारगोटी :एन वाय नवा भारत डिजिटल न्यूज नेटवर्क

आंतरराष्ट्रीय स्तरावर आरोग्यदायी जीवनशैलीचा संदेश देणारा जागतिक योग दिन उपजिल्हा रुग्णालय गारगोटी येथे उत्साहपूर्ण वातावरणात साजरा करण्यात आला. योगाच्या माध्यमातून शारीरिक, मानसिक आणि भावनिक आरोग्य सुदृढ ठेवण्याचा संदेश या कार्यक्रमातून देण्यात आला.

उपजिल्हा रुग्णालय गारगोटीच्या वैद्यकीय अधीक्षक डॉ. पल्लवी तारळकर यांच्या संकल्पनेतून आयोजित करण्यात आलेल्या या कार्यक्रमास वैद्यकीय अधिकारी, आरोग्य कर्मचारी तसेच रुग्णालयातील विविध विभागांतील कर्मचाऱ्यांचा उत्स्फूर्त प्रतिसाद लाभला. कार्यक्रमाच्या सुरुवातीला योगाचे महत्त्व, त्याचा दैनंदिन जीवनातील उपयोग आणि निरोगी समाज घडविण्यातील भूमिका याविषयी मार्गदर्शन करण्यात आले.

यावेळी योग व निसर्गोपचार तज्ज्ञ डॉ. श्रेयस चव्हाण (एम.डी. योगा अँड नॅचरोपॅथी) यांनी उपस्थितांना योगाचे विविध पैलू समजावून सांगितले. त्यांनी नियमित योगाभ्यासामुळे शरीराची लवचिकता वाढते, मानसिक ताणतणाव कमी होतो, रोगप्रतिकारक शक्ती मजबूत होते तसेच जीवनशैलीशी संबंधित अनेक आजारांपासून संरक्षण मिळते, असे सांगितले. त्यांनी विविध योगासने, प्राणायाम आणि ध्यानधारणेची प्रात्यक्षिके करून उपस्थितांकडून प्रत्यक्ष सरावही करून घेतला. त्यांच्या मार्गदर्शनाखाली सर्वांनी योगासने आणि श्वसनाचे व्यायाम उत्साहाने केले.

कार्यक्रमात आयुर्वेदिक वैद्यकीय अधिकारी डॉ. स्नेहल कुलकर्णी यांनी “निरोगी वृद्धत्वासाठी योग” या विषयावर मार्गदर्शन केले. वाढत्या वयानुसार शरीर आणि मन निरोगी ठेवण्यासाठी नियमित योगाभ्यासाचे महत्त्व त्यांनी विशद केले. योगामुळे सांधेदुखी, रक्तदाब, मधुमेह यांसारख्या अनेक समस्यांवर नियंत्रण ठेवण्यास मदत होते तसेच मानसिक स्वास्थ्य टिकून राहते, असे त्यांनी सांगितले.

कार्यक्रमाच्या समारोपप्रसंगी होमिओपॅथी तज्ज्ञ डॉ. सविता शेट्टी यांनी उपस्थितांचे आभार मानले. योग ही केवळ एक व्यायाम पद्धती नसून ती निरोगी आणि संतुलित जीवन जगण्याची जीवनशैली असल्याचे त्यांनी नमूद केले.

या कार्यक्रमास उपजिल्हा रुग्णालय गारगोटीचे सर्व वैद्यकीय अधिकारी, परिचारिका, आरोग्य कर्मचारी व इतर कर्मचारी मोठ्या संख्येने उपस्थित होते. सर्वांनी उत्स्फूर्तपणे योग प्रात्यक्षिकांमध्ये सहभाग नोंदवून आरोग्य संवर्धनाचा संदेश दिला. जागतिक योग दिनाच्या निमित्ताने आयोजित करण्यात आलेला हा उपक्रम आरोग्याविषयी जनजागृती निर्माण करणारा आणि निरोगी जीवनशैलीचा प्रसार करणारा ठरला.