रणवीर सिंगच्या ‘धुरंधर २’ चा बॉक्स ऑफिसवर धुमाकूळ; ५ दिवसांत ८०० कोटींचा ऐतिहासिक टप्पा पार
रणवीर सिंगच्या ‘धुरंधर २’ चा बॉक्स ऑफिसवर धुमाकूळ; ५ दिवसांत ८०० कोटींचा ऐतिहासिक टप्पा पार
मुंबई :एन वाय नवा भारत डिजिटल न्यूज नेटवर्क
भारतीय चित्रपटसृष्टीच्या इतिहासात पुन्हा एकदा एका मोठ्या चित्रपटाने कमाईचे सर्व जुने विक्रम मोडीत काढले आहेत. बॉलीवूडचा ऊर्जावान अभिनेता रणवीर सिंग आणि ज्येष्ठ अभिनेते राकेश बेदी यांची मुख्य भूमिका असलेला ‘धुरंधर: द रिव्हेंज’ हा चित्रपट सध्या बॉक्स ऑफिसवर सुसाट सुटला असून, अवघ्या पाच दिवसांत या चित्रपटाने जगभरात ८०० कोटी रुपयांहून अधिक गल्ला जमवला आहे. या अभूतपूर्व यशामुळे सिनेसृष्टीत आणि प्रेक्षकांमध्ये उत्साहाचे वातावरण पाहायला मिळत आहे.
आदित्य धर यांच्या दिग्दर्शनाखाली बनलेला हा हाय-ऑक्टेन स्पाय थ्रिलर १९ मार्च रोजी मोठ्या पडद्यावर दाखल झाला. प्रदर्शनाच्या पहिल्या दिवसापासूनच या चित्रपटाने प्रेक्षकांना सिनेमागृहाकडे खेचून आणले. सुरुवातीच्या तीन दिवसांतच या चित्रपटाने मोठी झेप घेतली होती, मात्र पहिल्या सोमवारी म्हणजेच पाचव्या दिवशी चित्रपटाच्या कमाईने सर्वांनाच थक्क केले. एरव्ही आठवड्याच्या मधल्या दिवसांत चित्रपटांची कमाई कमी होते, पण ‘धुरंधर २’ ने सोमवारी तब्बल ६५ कोटींहून अधिक व्यवसाय करत आपली पकड घट्ट ठेवली.
ताज्या आकडेवारीनुसार, या चित्रपटाने भारतात आतापर्यंत ५१९.१२ कोटी रुपयांची निव्वळ कमाई केली आहे. तर ग्रॉस कलेक्शनचा विचार करता हा आकडा ६१९.७६ कोटींच्या घरात पोहोचला आहे. केवळ भारतातच नव्हे, तर परदेशातील बाजारपेठेतही या चित्रपटाची जादू चालली असून तिथून २१० कोटी रुपये जमा झाले आहेत. अशा प्रकारे अवघ्या पाच दिवसांत या चित्रपटाचे एकूण जागतिक संकलन ८२९.७६ कोटी रुपये झाले आहे. विशेष म्हणजे, या चित्रपटाने अल्लू अर्जुनच्या ‘पुष्पा २’ सारख्या तगड्या चित्रपटाच्या हिंदी आवृत्तीचे विक्रमही धोक्यात आणले आहेत.
या चित्रपटाचे यश केवळ अॅक्शनमुळे नाही, तर त्यातील दमदार स्टारकास्टमुळेही मानले जात आहे. रणवीर सिंगसोबतच संजय दत्त, आर. माधवन आणि अर्जुन रामपाल यांच्या अभिनयाने प्रेक्षकांवर मोहिनी घातली आहे. ३ तास ४९ मिनिटांचा हा चित्रपट असूनही, त्यातील कथानक आणि तांत्रिक बाजू इतकी भक्कम आहे की प्रेक्षक खिळून राहत आहेत. आयमॅक्स आणि इतर मोठ्या स्क्रीनवर या चित्रपटाचे शो सलग हाऊसफुल्ल जात आहेत.
चित्रपट व्यापार विश्लेषकांच्या मते, ज्या वेगाने ‘धुरंधर २’ ची वाटचाल सुरू आहे, ते पाहता हा चित्रपट पहिल्या आठवड्यातच १००० कोटींचा आकडा पार करण्याची दाट शक्यता आहे. जर हा वेग कायम राहिला, तर भारतीय सिनेसृष्टीतील सर्वाधिक कमाई करणाऱ्या पहिल्या तीन चित्रपटांमध्ये या चित्रपटाचा समावेश होऊ शकतो. सध्या तरी बॉक्स ऑफिसवर ‘धुरंधर’चाच बोलबाला असून आगामी काळात हा चित्रपट आणखी कोणते नवे विक्रम प्रस्थापित करतो, याकडे सर्वांचे लक्ष लागले आहे.
